Ак бураннар (беренче вариант)
Күңел булмый, бураннарга
Чыгып бер бәйләнмәсәм.
Җанда — буран. Ярый инде
Буранга әйләнмәсәм.
Бураннарга буйсынам мин…
Буйсындыра да алам.
Торган саен якыная
Бураннар белән арам.
Роберт Миңнуллин
Абага чәчәге (икенче вариант)
Абага чәчәге хыялда гынамы,
Әллә соң ул чәчәк чынында буламы?
Буладыр, тик кайда
Икәнен кем белә,
Яшергәндер аны
Караңгы төн генә.
Һаман чибәр минем әнкәй
Әнкәйнең әле яшь чагын,
Чибәр чагын беләм мин.
Шуңа күрә Әнкәйнең мин
Картаюын теләмим!
Исән-сау бул, әни!
Бәлки, бик сагынмам
Дип киттем авылдан,
Ә күңел барыбер сагына.
Син калдың шул анда —
Сагынам шуңа да.
Гомер ит син исән-сау гына!
Хатыннар күңеле
Авыр чакта таяныгыз
Сез хатыннар күңеленә.
Ышанырсыз — хатыннарның
Күңеле таш түгеленә.
Бәхетле булыгыз!
Әгәр сез ир-егет икән.
Эш тотсын кулыгыз.
Кулыгыздан килгән кадәр
Игелек кылыгыз.
Әрем исе, әрем тәме
Кайтсам әгәр авылыма,
Чыксам әгәр болыннарга,
Әрем исе, әрем тәме —
Элек йөргән урыннарда.
Җырлыйм туган якта
Ничек ташлап китим,
Ничек ялгыз итим
Сөн буенда үскән талларны?
Кала чишмәләр дә,
Белмим нишләргә дә —
Ташлап китә алмам аларны.
Син, әни, берәү генә
Безнең хакта гына, әни,
Уйланасыңдыр инде.
Борчыласыңдыр инде син,
Куанасыңдыр инде.
Сөн буенда әнкәй басып тора
Сөн буенда әнкәй басып тора
Казан тарафында карашы.
Бигрәкләр дә ерак, ерак икән
Авылым белән Казан арасы.
