Бездә урманнар миләшле
Бездә урманнар миләшле,
Яратам ачы миләш.
Ә син нигә миләш өзми
Йөрисең иләс-миләс?
Рәис Риянов
Ак каеным
Салкын тауда ачы җилләр исә,
Каен аяклары кар-бозда.
Ак каеным, син бик охшагансың
Керфекләре туңган яшь кызга.
Читекләр
Безнең Арча читекләре
Елтыр ука бизәкле.
Читек кигән чибәр кызлар
Өзә бәгырь-үзәкне.
Эх, укалы читекләр!
Читек кигән кызлар белән
Бию рәхәт, егетләр!
Өфедә бар сөйгәнем
Өфе юллары карурман,
Өфе юллары озын.
Шунда сөйдем ил гүзәлен —
Урал таулары кызын.
Байкы буе
Байкы суы кая ага?
Өфе ягына бара.
Ярсу йөрәкне басарга
Табасы иде чара.
Усолка
Усолканың чишмәләре
Яшьлегем төсле икән,
Талган йөрәккә шифасы,
Дәвасы көчле икән.
Туган җирдә
Туган җирнең газиз малае мин —
Заман шулай ясап калдырган.
Үстерделәр мине кеше итеп
Кара икмәк белән балтырган.
Волжанка
Идел буенда кич җем-җем утлар,
Утлар яна Идел ярында…
Синең белән ничә төн уздырдык
Дуслар яккан учак янында.
Аргамагым сиңа алып килде
Атла әле, ашык, аргамагым:
Җитәсем лә килә, күрәсем.
Башын игән, сүрән генә атлый,
Ул нәрсәдер сизә, күрәсең…
Чәчәктә чакта сирень
Сиреньнәрнең чәчәкләре
Керфек каккан чагында,
Торасың син иләсләнеп
Татлы сер кочагында.
