Агачларга агачлар сыена,
Үтә салкын җилләр какканда.
Кешеләргә кешеләр таяна
Тайгак юлда, авыр чакларда.
Агачларның тамырлары — йөрәк,
Йөрәгемнең тамырлары — син.
Гомеремнең рәхәт вакытлары,
Кадерләре генә икән син.
Яфрак тавышлары, җил искәндә,
Шулай аңлашалар микән ни?
Яфрак бураннары йөрәгемдә —
Гомер синсез үтәр микән ни:
Агачларның тамырлары — йөрәк,
Йөрәгемнең тамырлары — син.
Гомеремнең рәхәт вакытлары,
Кадерләре генә икән син.
Агач булыр идем ышыкларга,
Сыеныр кешем булсаң янымда.
Яфраклардай шаулап яшәр идек,
Икәү булсак тормыш ярында.
Агачларның тамырлары — йөрәк,
Йөрәгемнең тамырлары — син.
Гомеремнең рәхәт вакытлары,
Кадерләре генә икән син.
