Мөслим (беренче вариант)

Бала кошлар оя ташлый,
Үскәч канатлары.
Китәм, иркен болыннарың
Озатып карап калыр.

Әй, Мөслим, инде нишлим —
Сагынырмын ич мин?
Яхшылыкларыңны, Мөслим,
Оныта алмам һич мин.

Яшькелт Ыкка һәрвакытта
Ашкынгандай Мәллә*,
Мәңге сиңа ашкынучы
Буламмы инде әллә?

Әй, Мөслим, инде нишлим —
Сагынырмын ич мин?
Яхшылыкларыңны, Мөслим,
Оныта алмам һич мин.

Әнкәм булып, яулык болгап,
Хәерле юл теләп,
Тынгы белмәс улларыңа
Аерылу көне килә.

Әй, Мөслим, инде нишлим —
Сагынырмын ич мин?
Яхшылыкларыңны, Мөслим,
Оныта алмам һич мин.

———
* Мәллә — Мөслим районындагы елга.

Оставьте комментарий