Шул тиклем дә мөлдер-мөлдер итеп
Мәхәббәтле бага күзкәең,
Саф мәхәббәт чишмәләрен табып,
Су эчтеңме әллә, гөлкәем?
Таң көзгесе — Чулпан йолдыз төсле,
Һай, көләкәч кенә йөзкәең.
Дәртле йөрәккәйне сулкылдатып,
Кайсы якта үстең, гөлкәем?
Үзкәеңне күреп туялмаслык,
Тал-чыбыктай нечкә билкәең,
Матурлыкның фәрештәсе булып —
Яралгансыңдыр син, гөлкәем…
Сүзкәйләрем тора тел очымда,
Барысын дә әйтеп бетмимем,
Салкыннарның кулы җаны — кырау,
Шуннан саклана күр, гөлкәем!
