Сер сөйләмә!

Сер сөйләмә җан дус диеп,
Җан дуслар да дошман була.
Чакма таштай дуслыкларны
Дөньяның маллары бүлә.
Сер сөйләмә, сер сөйләмә,
Сер сөйләмә беркемгә дә!

Сер сөйләмә сөйгән яр дип,
Сөйгән ярлар да ят була.
Безнең өз(е)леп сөйгән ярлар
Чит-ятларның яры була.
Сер сөйләмә, сер сөйләмә,
Сер сөйләмә беркемгә дә!

Сер сөйләмә беркемгә дә,
Сер сөйләмә! Бул син тып-тын.
Әйткән сүзең көмеш булса,
Әйтмәгән сүзләрең — алтын.
Сер сөйләмә, сер сөйләмә,
Сер сөйләмә, бул син тып-тын!

Оставьте комментарий